Жаңа жыл - ғажайып мереке!

Жаңа жыл! Жасымыз қаншада болса да, қайда жүрсек те, қандай қызмет атқарсақ та, сонау балалық шақта асыға күтетін жаңа жыл туралы ойламау, оны күтпеу мүмкін емес. Әсіресе балалар Жаңа жылды, Аяз Атаны, Ақшақарды, ойын-сауық пен қысқы демалысты ерекше тағатсыздана күтеді.  Осындай Жаңа жыл мерекесіне біздің құрметті "Аяз Атамыз"  -  Александр Иванович Табарин балаларға арнап жеті жүз килограмм шоколад кәмпиттерін беріп жіберген болатын.  Мектептің бірде-бір оқушысы назардан тыс қалған жоқ. Барлығына ең жаңа және дәмді тәттілер табыс етілді. Ауданымыздың Құрметті азаматы, меценат, Балкашин №1 орта мектебінің түлегі - Александр Иванович көп жылдар бойы оқушыларды тәтті сыйлықтарымен қуантуда. Ол - сондай мейірімді және жомарт жан!  Сонымен бірге мектебіміздің аз қамтылған, көп балалы отбасылардан шыққан жеті оқушысы аймағымыздың басты жаңа жылдық шыршасы - Әкім шыршасына қатысты.  Олар жаңа жылдық құттықтауларды тыңдап, аудан әкімі А.С.Үйсімбаевтан тәтті сыйлықтар мен ойыншықтар алды. Біздің мектеп мұғалімдері де жыл сайын мүгедек оқушыларға сыйлықтар дайындайды. Биыл 8 оқушы сыйлық алды. Жаңа жыл - адамдарды біріктіретін, жарқын, қызыққа толы мереке. Келе жатқан Жаңа жылымыздың қандай болатыны өзімізге де байланысты. Олай болса, Жаңа жылымыз құтты болсын!